BALUGU - Arif Rahman

BALUGU

Subli kada kawa mambayangakan apa nang kaina tarjadi kalu inya kada turun bacari gawian. Malihat muha anak wan bininya pina pucat nang kada kaya badarah lagi. Sudah talu hari anak nang bangaran Intan Kusuma pina gagaringan. Lawan di rumah jua  kada sing barasan ha pulang, nang dimakan cuma jawau haja dalam babarapa hari ini. Padahal awak  Subli  sabanarnya pina ladar jua. Tagal namanya kapala kaluarga mustiha Inya harus bacari, batanggung jawab. Ujar urang Banjar bahari, Dalas hangit biar awak lunglai asal anak bini kada tamakan  batu. Pancaharian sasain sakit, mamantat kada bakulih bacari gawian bilang sasain ngalih dicari.

Ari pina masih balum manampakan muha aslinya, batang-batang puhun niur di hadapanya pina mangaring, lampu-lampu jalanan sabagian balum pajahan. Bamula batis kanan  Subli balangkah maninggalkan palataran rumah sambil mambawa parang  ha di pinggang.

Kira-kira ada pang sudah saparapat jam Subli bajalan, tamandak  sambil baduduk Inya satumat kauyuhan di bawah puhun kasturi. Dijanakinya di sabarang jalan nang batulisan warung Nasi Kuning Mama Iyah nang tarkanal paling nyaman di kampung Muara Ujung. Tamandam Subli maitihi urang nang pina nyaman makanan di sana.  Ada batiga baranak makan di warung nasi kuning  pina asik banar. Ada jua nang manungkar gasan mambawa bulik karumah haja. Wan ada jua manungkar iwaknya haja. Pina baantri tu pang manungkar di warung nasi Mama Iyah. Paguninya pabila jua kawa mambawai anak wan bininya makan nasi kuning di warung Mama Iyah. Kaina mun dah dapat duit banyak, sakali-kali mambawa anak wan bini makanan di warung nasi kuning Mama Iyah ujar. Batikat Subli bacangkal  mancarikan duit gasan walanja anak wan bini.

“Subli.. Subli... Kasia pang satumat!”  Pak Haji Udin mangiyau  di dalam mobil nang baparkir parak warung nasi kuning Mama Iyah di sabarang jalan.

“Pun... Pak Haji, Inggih” sahut Subli bahancap mandatangi Pak Haji Udin sambil badoa bagimit “Mudahan hari ini dapat rajaki”. Pina takurihing.

Jantung Subli pina kadagupan, parasa hatinya pina bacampur rasa himung wan gugup. Jarang-jarang urang nang bapangkat Kapala Dinas mangiyau urang bawahan. Biasanya mun urang bapangkat kaya Pak Haji Udin mangiyau pastiha ada gawian, dalam hatinya.

“Kaini Subli, Kam siang ni kawalah main balugu wan aku, maksudnya kita bakawan badua. Aku tau Ikam bahari undasnya balugu. Nah... kabalujuran ada parlombaan dari Pemda, hadiahnya lumayan kawa gasan manungkar sapida motor bakas. Tapi kawalah Ikam ulahakan lugu gasan Aku damini jua” Ujar Pak Haji Udin.

Mandangar Haji Udin manyambat Undas balugu langsung lihum situ sini si Subli. Napang rasa kaingatan wayah Inya bahari nang katuju banar main lugu. Sampai disambati kakawalannya Datu Balugu. Apalagi  ada parlombaan sampai hadiahnya kawa manungkar sapida motor bakas, magin himung laju pada sapida tinjak  si Subli.

“Inggih... kawa banar ulun Pak Haji ai” kada pikir panjang lagi Subli

“Ayu ai mun kaitu, kuhadangi siang ni di lapangan tujuh pebruarilah, langsung bawakan lugu gasan aku, soalnya aku handak mahancap ka kantor dulu nah. Ini duit gasan maulah lugunya, kaina kutambahi lagi mun kurang” jar Pak Haji Udin maabilkan duit salambar saratus ribuan nang bawarna habang sambil pina handak bagagas.

“Cukup aja Pak Haji ai” jari Subli pulang manyahut

Subli pina kahimungan banar disuruh Pak Haji Udin. Awak nang pina ladar langsung ampih situ sini nang kayak mambuang palimpanan. kaluaran panyakit nang ada diawaknya, limpui paluh diunjuki duit. Muhanya pina takurihing haja. Saking himung Subli disuruh Haji Udin nang tarkanal di masyarakat sabagai urang nang badahi di kampung Muara Ujung. 

Ujar urang di kampung Muara Ujung. Pak Haji Udin itu, urangnya bilang darmawan banar, mun Pak haji manyuruh bagawian di wadah sidin, mustiha dibari sidin duit balabih, paling sadikit saratus ribu tu pang. Makanya kalau Pak Haji Udin mangiyau mustiha urang-urang nang di kampung Muara Ujung nitu hancap laju pada sapida tinjak mandatangi. Apalagi kalau sidin baacaraan di rumah, badayau tu pang para warga mandangani sidin. Timapa kada badayau datangan, satiap warga mustiha disangui sidin pulang imbah baacaran.

Balalu Subli bahancap tulak kapasar manungkar dampul wan ampalas. Balabihan banar Haji Udin nih maunjuki duit. Dalam hatinya kawa haja kaina ditukarkan kabaras atau nasi kuning Mama Iyah gasan di rumah. Sakaligus manungkarkan ubat  gasan Intan. Tapi pikirnya lagi mustiha harus bapadah jujur wan Pak Haji Udin barapa habisnya baulah lugu. Pak Haji Udin tu urangnya kada bungul, pastiha sidin tau parkiraan baulah lugu, mun sakali didustai kada pacangan diparcaya sidin lagi dalam hatinya.

***

Ari sudah sakitar jam sambilanan, angin dibur-dibur daras pina kada sing ampihan. Suara jangkrik bilang basahutan. dikikihinya oleh Subli wan parang satiap rumput bundung nang pina sing rimbunan kalu pina tatamu tampurung niur nang kawa diulah manjadi lugu. Kampung Muara Ujung  dikenal banar kampung padang niur, mancari tampurung niur di sana nyaman haja, tinggal cangkal kadanya ha lagi. Ada tadapat tampurung niur tapi dilihatnya pina anum. Ada jua tadapat  nang pina tuha banar. Kada sasuai nang Inya kahandaki. Nang dicarinya tuh tampurung niurnya kada talalu anum kada jua talalu tuha, nang sadang-sadang haja. tampurung nang sadang ni nyaman dibantuk wan stabil bila dimainkan. Kalau tampurung pina anum atawa pina tatuha pacangan hancur banar ai mun dagapuk musuh, dalam hatinya.

Barakat kacangkalan Subli, akhirnya tatamu jua tampurung nang dikahandakinya. situ sini tampurung niur ngitu dipapasnya pakai parang nang tajam bawaan mulai rumah. Tunggal dikitan tampurung niur nang pina sadang tadi dibentuknya nang kayak bidawang. diulahnya manjadi dua pasang. dipinggir-pinggirnya diampalasinya supaya licin mancarunung. Habis tuh diambilnya dampul tukarnya di pasar tadi. dirakatakannya lugu nang kayak bidawang tadi supaya barat wan tahan hantam. Tinggal maulah penapak haja lagi jar Subli sambil takurihing. Diambilnya sasabitan paring nang ada dibuncu parak puhuh niur. Ditataknya paring tadi pakai parang, adapang panjangnya tu kira-kira talu lima cintimeter wan libarnya kakurang labih dua atawa tiga cintimeter.

Malihat ulahan lugunya tu, Subli langsung kaingat kisahnya bahari. Siapa nang kada tau wan dih Inya nang julukannya di Muara Ujung tuh datu balugu. Saban hari gawiannya maulah lugu, dari mulai tampurung niur, sampai bahan palastik,  dari nang bajarang ada jua nang babakar. Macam-macam sudah eksperimennya. Subli tu pang ampunnya balugu.

Sudahnya Subli bila main balugu, undasnya tu pang jua. Bila main wan Subli mustiha ampun kakawananna tu hancuran dapat lugu Subli alias takipaian. Jadi pamanangnya tarus ai. Suah jua Inya main balugu bataruhan, ya bataruhan supermi haja pang. Tapi nang namana Datu Balugu. Kada dikisah tu pang.

Adapang kisah Subli nang Inya tasupani banar pas main balugu. Haratan Inya manapak lugu sing gancangan, sakalinya lugunya tuh jauh takipai takana si Siti nang haratan lewat, balalu siti pina handak sarik-sarik wan Subli. Kalimat Siti nang Inya ingat tu

“Ulun tau ai, Pian tu pura-pura manapak lugu sing gancangan, supaya takana kawadah Ulun loe! Mun handak minta perhatian dih Ulun bapadah haja”.

 Langsung katawaan kakawalan Subli nang baadaan di situ. Muha Subli mandam kada babakas. Gara-gara itu, jadi ajakan kakawalannya ai si Subli, disambati wan Siti. Paguni sakin disambati tarus wan Siti kabuncuaanya Subli wan Siti pina bahandakan badua, sampai tapakawin jua ai.

***

Matahari pina naik baingkit-ingkit tunggal kilanan. Sasar landung sasar batinggi wan sasar bapanas. Jalanan satapak nang asal pina baal bamulai pina mangaring.  Awan pina bagumpal nang kayak kapas putih mancarunung. Lugu pesanan Pak Haji Udin sudah tuntung diulahnya, masing-masing sabigi saurang lawan dih Inya. Nang urang dikatakan Datu Balugu bahari, maulah lugu bagi Subli enteng haja, satumat gin jadi.

Dialihkannya cangangannya ka puhun niur nang tinggi. Baganangan Inya nang kaya apa kaadaan anak wan bininya. Makan apa buhannya baisukan tadi. Masih ladarkah awak anaknya si Intan Kumala. Samalaman bininya wan Inya kada sing guringan manjagaai Intan nang garing. Sabagai kapala kaluarga, mustiha Subli harus bacangkal mancari duit gasan barubat wan makan sahari-hari. Memang musim wayah ini pina kada mangangaruan, satumat panas, satuma-tumat hujan. Hampir rata-rata urang nang di Muara Ujung pina bagagaringan jua.

Subli baparisip siang ini Inya harus menang main balugu, barang ham juara tiga atawa harapan. Nang Penting bagi Subli, umpat parlumbaan balugu nang dibawai Pak Haji Udin ada nang dibawa bulik. Satidaknya kawa gasan manungkarkan ubat wan baras dahulu. Kalu Inya juara jua pas ada kabalujuran ada duit labihan, kawa jua makanan nasi kuning di warung Mama Iyah. Kawa jua manungkarkan Siti baju dastar salambar-lambar, kawa jua manungkarkan mainan gasan Intan. Nazar Subli dalam hati.

Intan Kusama anak samata wayang Subli, nitu pang nang maramii di rumah. Anaknya tu pang harta nang baharaga bagi dih Inya. Katawa Intan haja sudah  himung banar tu pang parasaan Subli saking sayang banar wan anaknya. Parnah sakali Intan handak minta tukarkan mainan. Nang namanya kakanakan pasti ai mahamuk wan manangis kada ditukarakan. Padahal kabalujuran Subli kada tapi sing duitan. Hakun aja Subli maambil upah mangupas niur saharian demi manungarakan mainan gasan mahimungi anaknya.   

***

Karumunan urang pina rami banar bajalanan. Karicauan kakanakan babukahan pina karanjingan kahimungan. Lagu dangdut pina sing nyaringan. kada kalah jua sakali-kali suara tarumpit paman pentol pina mangiyau walau ari pina mancarunung panas tatap haja para paman pentol bajualan. Di tangah lapangan sudah batajak basusun rapi tinda-tinda dari pamarintah daerah. Adapang kira-kira limabelas tinda. Dijanakinya karumunan urang di tangah lapangan, pina hibak bajajal, satumat-tumat bakuciakan tatawaan.

“Subli... Subli...” Pina bakuciak banar ada nang mangiyau.

Ditingaunya kapala Subli ka arah kiwa, dilihatnya urang pina malambaikan tangan pina manyuruh Subli mandatangi nang kada lain Pak Haji Udin. Muha Subli langsung takurihim langsung mandatangi Pak H. Udin.

“Kayapa, sudah tuntungkah lugunya?”

“Inggih, sudah tuntung lugunya Pak haji ai” ujar Subli sambil manyarahakan hasil karyanya

Melihat hasil lugu ulahan Subli, Pak Haji Udin lihum pina kahimungan banar. Dijanaki sidin lugu ulahan Subli sambil dipusut-pusutnya. Sakali-kali ditimbangnya pakai tangan.

“Kada tasalah lagi aku manyuruh ikam maulahkan lugu, dasar harat banar ikam nih, halus banar gawianpun ikam nih, baratnya pina pas banar jua. Maka dibantuk nang kayak bidawang ha lagi. Bah... Mantap.. Mantap..” Haji Udin pina himung banar. Ayu ai, langsung aja kita kalapangan, itu sudah aku daftarkan. Ada duabelas tim nang main, tapi dibagi dua wan sistim gugur. Kita main nang katiga di lapangan partama.” Ujar H. Udin pulang manjalaskan wan Subli.

***

Karumunan urang pina rami banar bakuciakan sambil katawaan. Sakali-kali bakuciak “Janggut-janggut”. Kada katinggalan jua kakanakan maumpati jua. Diitihinya oleh Subli trik buhan nang cagar manjadi lawannya kaina main. Skima parmainan kada luput inya cangangi. Nang kayak urang handak manyusun strategi jua. Kisahnya kada kalah jua nang kayak main sipak bola.

“Kam aja  nang pingsut” jar Pak Haji Udin manyruh.

“Kada, pian aja gin Pak Haji ai nang pingsut, ulun maumpati haja”. Subli randah hati

Balalu ai Pak Haji Udin maambil ancang-ancang handak pingsut. adapang mandua talu kali Pak Haji Udin pingsut. Ujung-ujungnya Subli wan Pak Haji Udin bajaga maandak lugunya. dipasangnya lugunya badiri pas digaris nang sudah diatur oleh panitia. Pak Haji Udin nang barisan pamulaan, Sadangkan Subli maandak lugunya di barisan paling buncu.

Haratan buhan musuhnya mamulai manapak  handak mauntung ampun Pak Haji Uding wan Subli langsung babunyi.

“Plak...!” Suara lugu bagapuk

Langsung takipai lugu Ampun Haji Udin digapuk musuhnya. Rabah. Musuhnya nang kadua pulang bamulai mambidik lugu ampun Subli. dihantamkannya lugu musuhnya manggunakan panapak.

“Plakk...” Suara lugu bagapuk lagi

Rabah situ sini jua ampun Subli. Saking gancangnya musuhnya manapak lugu. Babuhan panuntung nang malihat pina tagang. Timbul pas dijanaki bujur-bujur sakalinya ujung-ujungnya lugu ampun musuhnya nang pacah balah dua. Lugu ampun Subli sadikitpun kadada nang ratak. Langsung manang ampun Subli wan Pak Haji Udin. Musuhnya pina geleng-geleng kapala, malihat lugu Subli kada  pacah. Kagum musuhnya malihat lugu ulahan Subli. Kanapa kada kagum, musuhnya bilang bahimat manapak sing gancangan supaya handak langsung manang. Baistilah banar handak mamacahkan lugu ampun Subli. Sakalinya ampun dih Inya saurang nang pacah. Jangankan musuhnya, panuntun gin bilang tanganga malihat lugu ampun Subli wan bakuriakan. Balalu Subli wan Haji Udin difavoritkan babuhan panuntun.

Pabila tatamu tim Subli wan Pak Haji Udin langsung pina takutan kada babakas tu pang musuhnya. Napang satiap bagapuk lugu ampun musuh wan lugu ampunnya Subli wan Pak Haji Udin. Mustiha pacah tarus ampun musuhnya. Ampun Subli wan Pak Haji Udin bilang kuat babanaran wan jua bidik-bidiknya  Subli manapak lugu. Dan Kaputingannya manang tarus Subli wan Pak Haji Udin balugu. Sampai jua ka final.

“Alhamdulillah... kafinal jua kita” jar Pak Haji Udin sambil tatawa.

Subli takurihing haja mandangar pandiran syukur Pak Haji Udin nitu. Dalam tikadnya, salangkah lagi dapat jua hadiah utamanya. Apa nang dihajatkan Subli sadikit lagi takabul jua. Sudah banyak parancanaan-parancanaan nang dikahandakinya mun manang balugu.  Handak manungkarkan baju dastar gasa Siti bininya, handak manungkarkan mainan gasan Intan anaknya, makanan nasi kuning di warung Mama Iyah. Tapi nang utamanya gasan mambawai baubat  anaknya pang diutamakannya dahulu. Dalam pikirannya, munya ada lalabihannya sadikt, kawa haja dibawa gasan bausaha, barangam bajualan pitul iwakah jar.

“Ayu Pak Haji... kita salasaikan partandingan balugu paampihan nih” Ujar Subli mambari samangat wan Pak Haji Udin.

Dilihatnya musuh difinal nih urangnya pina harat jua balugu. Dangar habar musuhnya nang difinal nitu, urangnya nang paling harat balugu di kampun kuranji atawa kampung subalah. Tapi nang namanya Subli kada gantar tu pang bahadapan atawa batanding. Sisa-sia kalau julukannya bahari sabagai Datu Balugu nitu takutan. Lain Subli namanya, ujar parasanya. Samunyaan di kampung Muara Ujung siapa nang kada tau wan Subli alias Datu Balugu. Bahari pang waktu jaman kakanakan.

Babuhan panuntun bajajal samakin banyak urangnya. Kada sabar malihat kaharatan pamain lugu nang sudah sampai kafinal. Sakin panasarannya siapa kaina di antara tim nang badua nitu yang manang sabagai juara satu.

 Balalui Pak Haji Udin bapingsut wan musuhnya. Ujung-ujungnya babuhan Subli nang bajaga. nang kaya biasa strategi Subli, lugu Pak Haji Udin baandak nang di garis pamualaan, sadangkan lugu Subli baandak di balakang. Ditapaknya panapak lugu musuhnya nitu kaarah lugu Pak Haji Udin wan Subli. Bunyi katapauan bilang sing nyaringan. Sudahnya lugunya takipai. Tapi kada sing pacahan, sama-sama kuat lugu ulahannya.

Babarapa kali babuhan Subli wan musuhnya ganti gapuk. Kaina tim subli nang naik, kaina tim musuhnya nang bajaga. Tatap haja jumlah pointnya sama, wan lugunya kadada nang pacahnya. Babuhan panitian wan panuntun diulahnya kagum wan tahiran-hiran malihat aksi seni babuhan final balugu. Saking haratnya wan bidik-bidiknya maunting lugu.

Pas giliran Subli wan Pak Haji Udin nang naik. dilihatnya nilai pointnya masih sama wan musuhnya. Kalau Subli atawa Pak Haji Udin lapas maunting lugu musuhnya, kamungkinan bisa langsung kalah. Tapi amun babuhannya kawa mamacahkan ampun musuhnya langsung manang situ sini.

Satatumat Subli manarik hinakannya. Jantungnya pina kadagupan. Kada biasanya Inya nang kaya ni. Gugup saking liwarnya.

Nang kaya nitu jua Pak Haji Udin. Gugupnya nitu parasa sidin mirip nang kayak babuhan BPK mamariksa kauangan.

Balalu Subli mamulai handak manapak undasnya, dikekernya lugu nang baandak di barisan muka, sambil dikira-kiranya jarak wan kakuatan tapakan.

“Plak....”

Lugu musuhnya nang baadakan dibarisan pamulaan langsung takipai dapatnya Subli. Tapulanting jauh dapatnya lugunya Subli. Babuhan panuntun bakuciakan kahimungan. Imbah nitu giliran Pak Haji Udin pulang handak maunting barisan lugu nang paling balakang. Saking gugupnya pada katiaanya sidin lapas maunting lugu musuhnya nang paling balakang habis jatah sidin manapak.

“Ayu Bli. Tinggal ikam aja lagi kasampatan” ujar Pak Haji Udin rada kaciwa sambil mamutivasi Subli.

Diitihinya pulang  lugu musuhnya nang tasisa nitu. dikekernya pulang jarak antara lugunya wan lugu musuhnya. Pangamatannya mata Subli, lugu musuhnya nitu pina ada retak sadikit. Paguninya kalau handak mamacahkan wan mamanangkan parlumbaan balugu ni, mustiha satidaknya harus dihantam nang retakkan lugu musuhnya. Tapi harus akurat wan gancang manapaknya damhatinya. Dipusutnya panapak nang ditangannya, sambil diciumnya panapaknya. Ditagakkanya panapak nitu kalugunya. Mata Subli bilang tajam nang kayak alang, mangkeker lugu musuhnya nang pina ada retak nitu. kada saap.

“Plakk...”

Takipai lugunya Subli wan musuhnya, kaduanya bagapuk babunyi sing nyaringan. Panglihatannya pina ada sarpihan nang takipai dari lugu nang bagapuk tadi. Subli langsung mandatangi lugu dih Inya. dijanakinya lugunya, sadikitpun kadada nang pacah. Kaitu jua musuhnya langsung mandatangi lugu nang dikipaiakan Subli. Kada katinggalan jua Pak Haji Udin manyasahi lugu musuhnya, handak mamastikan pacah atawa kadanya.

“Janggut... Janggut... Janggut...” Ujar Pak Haji Udin bakuciak “Menang kita Subli...” Pak Haji Udin batandik banar kahimungan malihat lugu ampun musuhnya balah dua, kada kawa lagi malanjutkan parmainan.

Para panuntun langsung bakuciakan, nang kayak di dalam stadiun sepak bola. Ada nang bahindik-hindik ada jua nang mangangkat tanganya, ada jua pina bahalulung marayakan jaguannya manang balugu.

Subli langsung situ sini sujud syukur saking kahimungan manang balugu. Impian Inya takabul jua handak manyamani anak wan bininya. Banyu matanya handak takaluar tapi tatap ditahaninya. Kada sangaja Inya mamaluk Pak Haji Udin saking himungnya.

***

Kadada tau pang nang kaya apa razaki datang, kadada nang tau pang nang kayapa jalan garis kahidupan dikamudian. Ujar paribahasa manusia nangini nang kaya wayang dimainkan ulih dadalang. Kayapapun haratnya pamainya, tatap ai diatur ulih nang ampuNya. Damintua jua si Subli nang bagalar Datu Balugu atawa abahnya Intan Kusuma urang Muara Ujung  nang asalanya pina ngalih banar handak bacari duit gasan baubat anak wan makan. Cah… Siapa nang manyangka sakalinya dapat duit mandabuk. Dalam riwayat hadist itu sudah dipadahkan siapa nang cangkal Insyallah tapakulih haja.

Matahari sudah handak balamas. Suara urang azan magrib pina saling basahutan. Awan-awan putih nang kaya kapas pina hilangan, ari nang asalnya pina salau-salau baubah mangadap. Tapi kadap ari kada maulah kadapnya parasaan Subli. Muhanya pina kahimungan banar. Hajat nang diinginkannya takabul jua. Talu lambar baju dastar gasan bininya Siti langsung ditukarkannya di pasar sajumput. Kada katinggalan jua mainan nang pina banyala wan babunyi ditukarkannya jua gasan anaknya.

Di hadapan rumah nang pina jabuk sudah banyalaan lampu lima watt. Lawang rumah pina barapatan haja alias kada takunci. Bamula Subli manunjul lawang rumah. Ditingaunya bininya Siti pina malamun sambil maayun Intan Kusuma.

“Ding… Lihati nah, Kakak sudah banyak mambawa duit. Ini Kakak tukarkan jua baju dastar nang hanyar gasn ikam Ding ai, Cuba lihati nah.” Subli sambil pina kahimungan banar manampaikan baju dastar wan duit nang hasil balugu tadi siang.

Siti pina kada mandangari nang apa dipandirkan lakinya Subli. Tangannya pina asyik maayun haja. Kada tau apa nang dipikirkannya. Barita bahagia nang disampaikan Subli sadikitpun kada dirispunnya. Siti pina kahilangan akal. Entah apa nang dipikirkannya. Raut muhanya pina sendu haja.

“Ding… kanapa Ikam, Intan masih garingkah? Ayu lakasi kita bawa baubat ka Mantri Adam. Duitnya cukup haja. Damini jua!”  Ujar Subli pina mambujuk pulang

Dua talu kali sudah Subli bapandir, tatap haja Siti kada mandangari. Tangannya pina kada baampihan maayun Intan Kusuma. Muhanya pina kada sing palingan. Matanya pina karing nang kayak sudah habis banyu mata nang kaluar. Kaputingannya tadangar suara gamat Siti baucap.

“Duit pian nitu, kadada gunanya lagi Kak ai gasan mambawa Intan Baubat” Sambil tatangis pulang.

Mandangar pandiran Siti tadi. Parasaan Subli langsung nang kayak disambar patir. Aura Subli asalnya pina tarang barubah 360 darajat barubah manjadi kadap. Muhanya wirai pina kada badarah lagi. Awaknya nang asalnya pina gagah langsung manggatar kada badaya. Baju dastar, mainan Intan wan duit hasil balugu tadi siang kadada lagi dipikirannya alias hilang nang kaya disulum bumi. Tunggal dikitan tangan Subli manjapai anaknya Intan Kusma nang diayunan, dijapainya awak Intan Kusama sudah dingin, batis wan tagannya tabujur kaku kada banyawa lagi.

“Inalillah wa Innalillahirojiun…!”

Tajalungkup Subli di bawah ayunan anaknya Intan Kusma, banyu matanya kada kawa ditahaninya takaluar pina daras. Mainan yang ditukarkan gasan Intan saulah-ulah kadada harganya lagi. Hajat-hajatnya kini surut bagaikan sungai nang karing kada babanyu lagi. Harta yang paling baharganya sudah maninggalkan Subli wan Siti salawasan dan kada mungkin lagi datang.

Batulicin, 18 Juni 2017

Arif Rahman (Bakulaan)

Hidup adalah seni yang terus dan terus kita jalani, kadang kita di atas dan kadang kita di bawah, kadang kita tertawa sejenak dan kadang kita akan menitikan air mata, dan kita hanyalah wayang yang tak tahu sampai mana ending dari seni dunia ini.

Bagikan Artikel ini